ಪವಿತ್ರ್ ಆತ್ಮ್ಯಾಕ್ ಸಮರ್ಪಿಲ್ಲಿ ಆಮ್ಚಿ ಫಿರ್ಗಜ್ 1990 ಜೂನಾಚಾ 10ವೆರ್ ಅಧಿಕೃತ್ ಜಾವ್ನ್ ಜಲ್ಮಾಕ್ ಆಯ್ಲಿ. ಪ್ರಸ್ತುತ್ ಹ್ಯಾ ಫಿರ್ಗಜೆಂತ್ 5 ವಾಡೆ ಅಸೊನ್ 133 ಕುಟ್ಮಾಂ ವಸ್ತಿ ಕರುನ್ ಆಸಾತ್. 133 ಕುಟ್ಮಾಂ ಪೈಕಿ ಚಡಾವತ್ ಕುಟ್ಮಾಂ ಹಿ ಫಿರ್ಗಜ್ ಜಾಂವ್ಚೆ ಆದಿಂ ಫೆರಾರ್ ಆನಿ ಪಾಲಡ್ಕ ಫಿರ್ಗಜೆಚಿಂ ಜಾವ್ನಾಸ್‌ಲ್ಲಿಂ.

ಸಂಪಿಗೆ, ಬಾನಂಗಡಿ ಆನಿ ಅಶ್ವಥಪುರ ಹ್ಯಾ ಪರಿಸರಾಂತ್ಲ್ಯಾ ಲೊಕಾಕ್ (ಪಯ್ಶಿಲ್ಲಿ ವಾಟ್ ಜಾಲ್ಲ್ಯಾನ್) ಪಾಲಡ್ಕ ವ ಫೆರಾರ್ ಇಗರ್ಜೆಕ್ ಮಿಸಾಕ್ ವಚೊಂಕ್ ತ್ರಾಸ್ ಜಾತಾಲೆ.

1942ಂತ್ ಪಾಲಡ್ಕ ಫಿರ್ಗಜೆಚೊ ವಿಗಾರ್ ಮಾ| ಬಾ| ಅಂತೋನ್ ನೊರೊನ್ಹಾ ಹಾಂಕಾ ಸಂಪಿಗೆಂತ್ ಏಕ್ ಕೊಪೆಲ್ ಆಸಾ ಕರಿಜಯ್ ಮ್ಹಣ್ ಮನ್ ಆಸ್‌ಲ್ಲೆಂ ತರೀ, ತಾಂಚೆಂ ಹೆಂ ಸ್ವಪಾಣ್ 1978ಂತ್ ಪಾಲಡ್ಕಾ ಫಿರ್ಗಜೆಚೊ ವಿಗಾರ್ ಜಾವ್ನ್ ಆಯ್ಲೆಲ್ಲ್ಯಾ ಮಾ| ಬಾ| ಓಸ್ಪಾಲ್ಡ್ ಲಸ್ರಾದೊ ಹಾಣಿಂ ಜಾರಿ ಕೆಲೆಂ. ಹ್ಯಾ ಅಯಿನ್ನ್ ವೆಳಾರ್ ಸಂಪಿಗೆಚ್ಯಾ ದೆ| ಪಾವ್ಲ್ ಡಿ'ಸಿಲ್ವಾ ಆನಿ ಕುಟ್ಮಾನ್ ಕೊಪೆಲ್ ಬಾಂದ್ಚೆಂ ತರ್ ಸ್ವ ಖುಶೆನ್ ಜಾಗೊ ದಿತಾಂ ಮ್ಹಣ್ ಭಾಸಯ್ಲೆಂ ಹಿ ತಾಂಚಿಂ ಭಾಸಾವ್ಣಿಂ ತಾಂಚೊ ಪೂತ್ ಶ್ರೀ ಜೋರ್ಜ್ ಡಿ'ಸಿಲ್ವಾ ಹಾಣೆಂ ಜಾರಿ ಕೆಲಿ.

ಕೊಪೆಲ್ ಸ್ಥಾಪನ್ ಕರ‍್ತಾಸ್ತಾನಾ “ಫಾತಿಮಾ ಸಾಯ್ಬಿಣಿ''ಚೆಂ ಕೊಪೆಲ್ ಮ್ಹಣ್ ನಾಂವ್ ದಿಲ್ಲೆಂ, ಉಪ್ರಾಂತ್ “ಪವಿತ್ರ್ ಅತ್ಮ್ಯಾಚೆಂ" ಕೊಪೆಲ್ ಮ್ಹಣೊನ್ ನಾಮಕರಣ್ ಕೆಲೆಂ.

1979‌ ಇಸ್ವೆಂತ್ ಮಾ| ಬಾಪ್ ಓಸ್ವಲ್ಡ್ ಲಸ್ರಾದೊ ಆನಿ ಡಾರ್ಜಿಲಿಂಗ್ ಮಿಶನರಿ ಜಾವ್ನ್ ವಾವುರ‍್ಚೊ ಪಾಲಡ್ಕ ಗಾಂವ್ಚೊ ಮಾ| ಬಾ। ಎಲಿಯಾಸ್ ಪಿಂಟೊ ಹಾಣಿಂ ಪಯಿಲ್ಲೆಂ ಮಿಸಾಚೆಂ ಬಲಿದಾನ್ ಲೊಕಾಂನಿ ಆಸಾ ಕೆಲ್ಲ್ಯಾ ಲ್ಹಾನ್‌ಶ್ಯಾ ಗೊವೊಳಾಂತ್ ಭೆಟಯ್ಲೆಂ.

ಅಧಿಕೃತ್ ಫಿರ್ಗಜೆಚೆಂ ಸ್ಥಾಪನ್ : 

ಸಂಪಿಗೆ ಕೊಪೆಲ್ ಏಕ್ ಸ್ವತಂತ್ರ್ ಫಿರ್ಗಜ್ ಜಾವ್ನ್ ಸ್ಥಾಪನ್ ಕರ್ಚ್ಯಾ ಉದ್ದೇಶಾನ್ ಮಂಗ್ಳರ‍್ಚೊ ಗೊವ್ಳಿ ಬಾಪ್ ಅ| ಮಾ| ದೊ| ಬಾಜಿಲ್ ಸೊಜ್ ಹಾಣಿಂ ಮಾ| ಬಾ| ಲುವಿಸ್ ಪಾವ್ಲ್ ಸೊಜ್ ಆನಿ ಮಾ| ಬಾ| ಮಾರ್ಕ್ ವೇಗಸ್ ಹಾಂಕಾ ಸಂಪಿಗೆ ಭೆಟ್ ದೀವ್ನ್ ಗರ್ಜೆಚಿ ಮಾಹೆತ್ ಅಪ್ಣಾಂವ್ಕ್ ನಮಿಯರ‍್ಲೆಂ. ಸಂಪಿಗೆ ಕೊಪೆಲಾಕ್ ಲಾಗಿಂ ಆಸ್ಚಿಂ ಸುಮಾರ್ 97 ಕುಟ್ಮಾಂ ಹ್ಯಾ ಫಿರ್ಗಜೆಚಿಂ ಕುಟ್ಮಾಂ ಜಾಲಿಂ. (ಆದಿಂ ಹಿಂ ಕುಟ್ಮಾ ಫೆರಾರ್ ಆನಿ ಪಾಲಡ್ಕ ಫಿರ್ಗಜೆಚಿಂ) 1984 ಜುಲೈ 1 ವೆರ್ ಸ್ವತಂತ್ರ್ ಕೊಪೆಲ್ ಮ್ಹಣ್ ಓಲಾವ್ನ್ ಮೂಡ್‌ಬಿದ್ರಿ ವಾರಾಡ್ಯಾಕ್ ವಿಲೀನ್ ಕೆಲೆಂ.

ಫಿರ್ಗಜೆಕ್ ಸೆವಾ ದೀಂವ್ಕ್ ಯೆಂವ್ಚ್ಯಾ ಯಾಜಕಾಂಕ್ ವಸ್ತೆ ಘರ್ ನಾತ್ಲೆಲ್ಯಾ ವರ್ವಿಂ ಗೊವ್ಳಿಬಾಪಾಂನಿ ಹಿ ಜವಾಬ್ದಾರಿ ತವಳ್ ನಿಡ್ಡೋಡಿ ಫಿರ್ಗಜ್ ವಿಗಾರ್ ಜಾವ್ನಾಲ್ಯಾ ಮಾ| ಬಾ| ನೊರ್ಬಟ್ ಲೋಬೊ ಹಾಂಕಾ ದಿಲಿ. ಲೋಬೊ ಬಾಪಾಂನಿ ಗಾಂವಾಂತ್ ತಶೆಂ ಪರ್ಗಾವಾಂತ್ ಆಸ್ಲೆಲ್ಯಾ ಫಿರ್ಗಜ್‌ಗಾರಾಂಕ್ ಆನಿ ಹೆರಾಂಕ್ ಸಂಪರ್ಕ್ ಕರುನ್ ದಾನ್ ಜಮಯ್ಲೆಂ, ಆನಿ ಫಕತ್ ಸಾತ್ ಮಹಿನಾಚ್ಯಾ ಅವ್ದೆ ಭಿತರ್ ವಸ್ತೆ ಘರಾಚೆಂ ಕಾಮ್ ಸಂಪಯ್ಲೆಂ ಹ್ಯಾಚ್ ವೆಳಾರ್ ಕೊಪೆಲಾಚಿಯ್ ದುರಸ್ತಿ ಕೆಲಿ.

1987ಂತ್ ಮಾ| ಡೆನಿಸ್ ಸೊಚ್ ಬಾಪ್ ನಿಡ್ಡೋಡಿ ಫಿರ್ಗಜ್ ವಿಗಾರ್ ಜಾವ್ನ್ ಆಯ್ಲೆ, ತಾಣಿಂ ಸಂಪಿಗೆ ಕೊಪೆಲಾಚಿ ಜವಾಬ್ದಾರಿ ಹಾತಿಂ ಘೆತ್ಲಿ. ಆಯ್ತಾರಾಚೆಂ ನಿಡ್ಡೋಡಿ ಫಿರ್ಗಜೆಂತ್ ಮಿಸಾಚಿ ಭೆಟವ್ಣಿ ಆಸ್ಲಲೆ ವರ್ವಿಂ, ಸನ್ವಾರಾ ಸಾಂಜೆರ್ ಸಂಪಿಗೆಚಾ ಲೊಕಾಕ್ ಮಿಸಾಚಿ ಭೆಟವ್ಣಿ ಆಸಾ ಕೆಲಿ. ಲೊಕಾಚಾ ಬರ‍್ಯಾ ಮನಾನ್ 50 ಹಜಾರ್ ರುಪಯ್ ಜಮಾವ್ನ್ ಸಂಪಿಗೆ ಫಿರ್ಗಜೆಚ್ಯಾ ನಾಂವಾರ್ ಬ್ಯಾಂಕಾಂತ್ ಜಮೊ ಕೆಲೆ.

1990 ಜೂನ್ 10ವೆರ್ ಸಂಪಿಗೆ ಏಕ್ ಸ್ವತಂತ್ರ್ ಫಿರ್ಗಜ್ ಮ್ಹಣೊನ್ ಗೊವ್ಳಿ ಬಾಪಾಂನಿ ಅಧಿಕೃತ್ ಜಾವ್ನ್ ಪರ್ಗಟ್ಲಿ.

1990ಂತ್ ಪಯ್ಲೊ ವಿಗಾರ್ ಜಾವ್ನ್ ಮಾ| ಬಾ| ಸೈಮನ್ ಸೊಜ್ ಹಾಂಕಾ ನೇಮಕ್ ಕೆಲೆಂ. ಫಿರ್ಗಜೆಚ್ಯಾ ಪ್ರಗತೆಂತ್ ತಾಂಚೊ ಪಾತ್ರ್ ಮಹತ್ವಾಚೊ. ಮಾ| ಬಾ| ಸೈಮನ್ ಸೊಜಾಚಿ ಭಲಾಯ್ಕಿ ಭಿಗಡ್ಲೆ ವರ್ವಿಂ ಮಾ| ಬಾ| ಮೆಕ್ಸಿಮ್ ಪುರ್ಟಾದೊ ನವೆ ವಿಗಾರ್ ಜಾವ್ನ್ ಆಯ್ಲೆ. ತಾಣಿ ತಾಂಚಿA ಸೆವಾ ಹ್ಯಾ ಫಿರ್ಗಜೆಕ್ ದಿಲ್ಯಾ.

1997 ಜೂನ್ 30 ವೆರ್ ಮಾ| ಬಾ| ಲುವಿಸ್ ಕುಟಿನ್ಹೊ ನವೆ ವಿಗಾರ್ ಜಾವ್ನ್ ಆಯ್ಲೆ. ಹಾಂಚಾ ಮುಖೇಲ್‌ಪಣಾರ್ ಸಂಪಿಗೆ ಫಿರ್ಗಜೆಚೆಂ ರೂಪ್‌ಚ್ ಬದ್ಲಲೆಂ. ಹಾಂಕಾಂ ಲೊಕಾ ಥಾವ್ನ್ಯಿ ವರ್ತೊ ಸಹಕಾರ್ ಲಾಬ್ಲೊ.

ನವಿ ಘಾಂಟಿಚಿ ತೋರ್, ರಂಗ್‌ಮಂಟಪ್, ಮಾಡಾಚೆಂ ತೋಟ್ ಆನಿ ನವಿ ಇಗರ್ಜ್ ಉಬಾರ್‌ಲ್ಲಿ ಕೀರ್ತ್ ಹಾಂಕಾ ಫಾವೊ ಜಾತಾ.

2005ಂತ್ ಮಾ| ಬಾ| ಡೆನಿಸ್ ಸೊಜ್ ಸಂಪಿಗೆ ವಿಗಾರ್ ಜಾವ್ನ್ ಆಯ್ಲೆ. ಗ್ರೊಟ್ಟೊ, ಇಗರ್ಜೆಚಾ ವಠಾರಾಂತ್ ಖುರಿಸ್, ಇಗರ್ಜೆಕ್ ನವೆ ಬಾಂಕ್, ಖುರ್ಸಾವಾಟೆ ಪಾಯ್ನೆಲಾಂ... ಇತ್ಯಾದಿ ಬರಿಂ ಕಾಮಾ ಲೊಕಾಚಾ ಸಹಕಾರಾನ್ ತಾಣಿ ಕೆಲ್ಯಾಂತ್.

2010 ಮೇ 25 ವೆರ್ ಮಾ| ಬಾ| ಅಪೊಲಿನಾರಿಸ್ ಕ್ರಾಸ್ತಾ ಸಂಪಿಗೆ ಫಿರ್ಗಜೆಕ್ ನವೆ ವಿಗಾರ್ ಜಾವ್ನ್ ಆಯ್ಲೆ. ಹಾಣಿಂ ಹೊಲಾಚಿ ದುರುಸ್ತಿ, ಇಗರ್ಜ್ ಪೈಂಟಿಂಗ್ ಆನಿ ಇಗರ್ಜೆ ವಠಾರ್ ಫುಲಾಂ ಝಡಾಂನಿ ರಂಗಾಳ್ ಕರುನ್ ಸೊಬಯ್ ಚಡಯ್ಲಿ. ಸಬಾರ್ ವರ‍್ಸಾಂ ಆದಿಂ ಫಿರ್ಗಜೆಕ್ ದಾನ್ ಜಾವ್ನ್ ದಿಲ್ಲೊ ಜಾಗೊ ಹಾಂಚ್ಯಾ ವ್ಹಡಾ ಮಿನತೆನ್ ಇಗರ್ಜೆಚ್ಯಾ ನಾವಾರ್ ದಸ್ತಾವೇಜ್ ಜಾವ್ನ್ ಇಗರ್ಜೆ ಜಾಗ್ಯಾಕ್ ದೊರೊ ಉಬರ‍್ಲೊ. ಫಿರ್ಗಜೆಚೊ ರಪ್ಯೋತ್ಸವ್ ಹಾಂಚ್ಯಾ ಮುಖೆಲ್ಪಣಾಖಾಲ್ ಗದ್ದಳಾಯೆನ್ ಸಂಭ್ರಮ್ಲೊ ಮಾತ್ರ್ ನ್ಹಂಯ್ ತ್ಯಾ ವರ್ಸಾ ಲಗ್-ಬಗ್ 20 ಲಾಖಾಂಚೆ ಕಾಮ್ ರ‍್ನ್ ಇಗರ್ಜೆ ವಠಾರ್ ಆಕರ್ಷಿತ್ ಜಾಲೆಂ. 

2017 ಜೂನ್ 09 ತಾರಿಕೆರ್ ಸಂಪಿಗೆ ಫಿರ್ಗಜೆಕ್ ವರ್ಗ್ ಜಾವ್ನ್ ಆಯ್ಲೆ ಮಾ| ಬಾ| ನೆಲ್ಸನ್ ಒಲಿವೆರಾ ಆಮ್ಚಿ ಫಿರ್ಗಜ್ ಉಂಚ್ಲ್ಯಾ  ಪಾಂವ್ಡಾಕ್ ಪಾವೊಂಚ್ಯಾಕ್ ವರ್ತಿ ಮಿನತ್ ಘೆವ್ನ್ ವಾವರ‍್ಲೆ. ಭದ್ರತೆ ದೃಷ್ಟಿನ್ ಸಿ.ಸಿ. ಟಿವಿ ಕ್ಯಾಮಾರಾ, ದೇವ್‌ಸ್ತುತೆಕ್ ಪೂರಕ್ ಜಾವ್ನ್ ಟಿ.ವಿ. ಸ್ಕ್ರಿನ್ ಆನಿ ನೊವೊ ಸೌಂಡ್ ಸಿಸ್ಟಮಾಚಿ ವ್ಯವಸ್ಥಾ ಕೆಲಿ. ರಕ್ತದಾನ್ ಶಿಬಿರ್, ಬೊಲಾಯ್ಕಿ ಮಾಹೆತ್ ಶಿಬಿರ್, ಆಶ್ರಮ್ ಭೆಟ್ ಅಶೆಂ ವಿವಿಧ್ ಅರ್ಥಾಭರಿತ್ ಕಾರ್ಯಕ್ರಮಾಂ ಕರ‍್ನ್ ಆಮ್ಚಿಂ ಸಂಪಿಗೆ ಫಿರ್ಗಜ್ ಜಿವಾಳ್ ಕೆಲಿ. ಆಮ್ಚ್ಯಾ ಫಿರ್ಗಜೆಂತ್ಲೆ ಐ.ಸಿ.ವೈ.ಎಮ್ ಘಟಕ್ ದಿಯೆಸೆಜಿಂತ್ಲ್ಯಾ 10 ಅತ್ಯುತ್ತಮ್ ಘಟಕಾ ಪೈಕಿ ಚೊವ್ತೆಂ ಸ್ಥಾನ್ ಆಪ್ಣಾಯ್ಲೆಂ. ಮೊಂತಿ ಫೆಸ್ತ್ ಆಚರಣ್ ಆನಿ ವಾಡ್ಯಾ ಸಮುದದ ಆಚರಣ್, ಹಿಂದೂ ಬಾಂವ್ಡಾ ಸವೆಂ ಕ್ರಿಸ್ಮಸ್ ಬಂಧುತ್ವ ಸಹಮಿಲನ್ ಆಚರಣ್ ರ‍್ನ್ ಲೊಕಾ ಮೊಗಾಳ್ ವಿಗಾರ್ ಜಾಲೆ.

16-05-2023 ವೆರ್ ಮಾ| ಬಾ| ವಿನ್ಸೆಂಟ್ ಡಿಸೋಜಾ ಸಂಪಿಗೆ ಫಿರ್ಗಜೆಕ್ ನವೆ ವಿಗಾರ್ ಜಾವ್ನ್ ಆಯ್ಲೆ. ಹಾಂಚ್ಯಾ ಮುಖೆಲ್ಪಣಾಖಾಲ್ ಎದೊಳ್‌ಚ್ಚ್ ಎಕಾ ವರ್ಸಾಂನಿ ಲಗ್-ಬಗ್ 50 ಲಾಖ್ ಖರ್ಚಾರ್ ಇಗರ್ಜೆಚೆಂ ನವೀಕರಣಾಚೆಂ ಕಾಮ್ ತಶೆಂಚ್ ಸಿಮಿಸ್ತೆçಚೊ ದೊರೊ ಭಾಂದ್ಚೆ ಕಾಮ್ ಯಶಸ್ವಿ ರಿತಿನ್ ಸಂಪಯ್ಲಾ.

ಸಂಪಿಗೆ ಫಿರ್ಗಜ್ ಆಜ್ ಪ್ರಗತಿ ಜಾವ್ನ್ ಆಸಾ ತರ್ ಸಬಾರ್ ಉದಾರ್ ಮನಾಚಾ ದಾನಿಂಚೊ, ಫಿರ್ಗಜ್‌ಗಾರಾಂಚೊ, ಯಾಜಕಾಂಚೊ ತ್ಯಾಗ್ ಆನಿ ಸಾಕ್ರಿಫಿಸ್ ಕಾರಣ್. ಫಿರ್ಗಜೆಚಿ ವಾಡಾವಳ್ ವ ಪ್ರಗತಿ ಆನಿಕೀ ಬರಿ ಜಾವ್ನ್ ಜಾಯ್, ವಾಡಾತ್ತ್ ವಚೊಂ

Source: With reference from Parish Souvenir Books